أكد وليد عطية، قائد الفريق الأول لكرة القدم بنادي المنصورة، أن الفوز على بلدية المحلة في افتتاح مشوار الفريق بدوري المحترفين يمثل بداية مهمة، مشيدًا بدور جماهير النادي التي ساندت اللاعبين طوال المباراة.
وقال وليد عطية: “بنحمد ربنا على ماتش البلدية وأغلى 3 نقاط بالنسبة لنا كبداية دوري. الحمد لله قدرنا نفرح جمهور المنصورة اللي من أول دقيقة لآخر دقيقة كان بيشجعنا، سواء كسبانين أو خسرانين أو متعادلين. بصراحة الجمهور ده بيتعب معانا أوي، وإن شاء الله نفرحهم دايمًا”.
وتحدث قائد المنصورة عن تسجيله هدف التعادل، قائلًا: “إن أنا جبت أول جون في الموسم أو مع فرقتي، ده بتوفيق ربنا ومجهود زمايلي في الملعب. الحمد لله كلنا تعبنا طول الأسبوع، والكابتن حسام عبد العال اشتغل معانا، وبعده الكابتن ياسر عبد الواحد اشتغل وتعب معانا”.
وأضاف: “السيناريو كان غريب بالنسبة لنا، إنك تبقى خسران على ملعبك، وفي الدقيقة 85 تجيب التعادل وبعدها بدقيقة أحمد شاهين يجيب جون المكسب. الحمد لله، كل ده توفيق ربنا”.
وكشف وليد عطية عن حديث ياسر عبد الواحد معه قبل مشاركته، قائلًا: “الكابتن ياسر كلمني وأنا نازل وقال لي: إحنا خسرانين، لازم تبقى لك بصمة، على الأقل نتعادل وبعد كده نفكر في المكسب. انزل اعمل شغلك، أنت لاعب خبرة ولاعب كبير، والتسديدة اللي تجيلك إن شاء الله تحطها. والحمد لله حصل”.
وأشاد قائد المنصورة بالمدير الفني، مؤكدًا: “الكابتن ياسر بالنسبة لي من زمان قوي، زي أخ كبير ليا ومدرب كبير طبعًا، وإحنا كلنا اللاعبين في ضهره، وعارفين إنه في ضهرنا على طول”.
ووجه وليد عطية رسالة لجماهير المنصورة، قائلًا: “اللعيبة والجهاز والإدارة نوعد جمهور المنصورة إن الصعود مش بعيد. الفرقة كلها زي بعضها، وشوية إصرار وشوية مجهود وقلب، وإن شاء الله دوري ممتاز”.
وعن مواجهة فاركو المقبلة، قال: “ماتش فاركو هناخده زي أي ماتش، طبعًا هو ماتش صعب، فريق نازل من الدوري الممتاز، لكن اتكلمت مع اللعيبة النهاردة، الحمد لله على المكسب اللي فات ونقفل الصفحة ونركز في ماتش فاركو”.
واختتم: “عندنا مهمة ومعركة بجد، لأنك هتلعب فاركو في استاد المكس. ماتش قوي جدًا، فريق كسبان وإنت فريق كسبان، فالموضوع هيبقى صعب. إن شاء الله نروح ناخد التلات نقاط ونفرح نفسنا ونفرح جمهور المنصورة”.
